Vörur unnar úr eðalmálmum

Vörur úr eðalmálmi sem seldar eru á Íslandi úr gulli, silfri, palladíum og platínu eiga að uppfylla lög um vörur unnar úr eðalmálmum nr. 77/2002 og reglugerð um vörur unnar úr eðalmálmum nr. 938/2002. Reglurnar ná bæði yfir vöru sem framleidd er á Ísland sem og innfluttar vörur.

Ábyrgðarstimplar sem eiga að vera á vörum sem unnar eru úr eðalmálmum eru hreinleikastimpill og nafnastimpill. Hreinleikastimpillinn segir til um þann hreinleika sem seljendur lofa við sölu á vörunni. Nafnastimpill segir til um hver sé framleiðandi eða innflytjandi vörunnar en hann ber ábyrgð á vörunni og að hún samræmist kröfum.

Nafnastimpill auðkennir framleiðanda, seljanda eða innflytjanda vöru þannig að hægt sé að rekja uppruna hennar.

Hreinleikastimpill er þriggja tölustafa stimpill sem sýnir hversu mikið magn af hreinu gulli, silfri, palatínu eða palladíum er í viðkomandi vöru.

Gull: 916,750,585,375.
Silfur: 800,830,925 eða 800S, 830S, 925S.
Platínum: 950, 900, 850 eða 950Pt, 900Pt, 850Pt.
Palldíum: 950, 500 eða 950Pd, 500Pd

Neytendur geta því gengið úr skugga um það að skartgripur innihaldi í raun það magn af hreinum eðalmálmi sem seljandi heldur fram með því að athuga hvort hreinleikastimpill sé á skartgripnum og hver hreinleikinn sé samkvæmt stimplinum. Framleiðandi vöru sem unnin er úr eðalmálmum ber ábyrgð á að varan sé stimpluð í samræmi við þessar kröfur. Ef um innflutta vöru er að ræða hvílir ábyrgðin á innflytjanda hennar.

Nánari upplýsingar um ákvæði fyrrgreindra laga og reglugerðar má finna hér.