Neytendastofa leggur stjórnvaldssektir á Kredia og Smálán

Neytendastofa hefur lokið ákvörðunum gagnvart Kredia og Smálánum vegna kostnaðar í tengslum við lán sem félögin veita og upplýsingagjafar við lánveitingu.

Málið snýr að því að félögin bjóða neytendum kaup á rafbókum sem hægt að óska eftir láni fyrir. Neytendur geta um leið óskað eftir öðru láni, ótengdu bókakaupaláninu. Bæði Kredia og Smálán litu svo á að þar sem um væri að ræða lán fyrir kaupum á hlut kæmi kaupverð ekki til álita þegar reiknaður væri út heildarlántökukostnaður og árleg hlutfallstala kostnaðar. Niðurstaða Neytendastofu var hins vegar sú að líta bæri á kaupverð rafbókanna sem kostnað við lántöku. Byggði stofnunin þá niðurstöðu m.a. á því að um er að ræða rafbækur sem eru aðgengilegar öllum á Netinu án greiðslu. Því liti stofnunin svo á að kaupverðið væri yfirskyn og tilraun til að fara framhjá fyrri ákvörðun stofnunarinnar og ákvæðum laga um neytendalán.

Þegar hið svokallaða kaupverð er tekið með í útreikning heildarlántökukostnaðar og árlegrar hlutfallsölu kostnaðar fer árleg hlutfallstala kostnaðar upp fyrir leyfilegt hámark samkvæmt lögum um neytendalán og var félögunum því bannað að innheimta svo háan kostnað í tengslum við lánveitingu.

Neytendastofa gerði einnig athugasemdir við að upplýsingagjöf félaganna við lánveitingu væri ekki fullnægjandi þar sem upplýsingar skortir bæði í staðlað eyðublað sem afhenda á neytendum fyrir lántöku og í lánssamning. Þá gerði Neytendastofa athugasemdir við að staðlað eyðublað sé ekki afhent neytendum áður en lánsumsókn er afgreidd.

Í ljósi þessara brota lagði Neytendastofa stjórnvaldssekt að fjárhæð 750.000 kr. á hvort fyrirtæki.

Sjá nánar ákvörðun nr. 16/2016 (Kredia ehf.)  og ákvörðun 17/2016 (Smálán ehf. )