Snuð með nafni

Neytendastofu hafa borist þó nokkrar tilkynningar um snuð, þar sem túttan er að losna af eða er við það að losna. Þessi tegund af snuði er pöntuð á netinu á breskri síðu og er hægt að biðja um að þau séu merkt. Vinsælt er að setja nafn barnsins á snuðin. Þar sem snuðin fást ekki á Íslandi hefur Neytendastofa leitað upplýsinga hjá systurstofnunum sínum á Norðurlöndunum. Við prófanir á snuðunum hefur ekkert komið í ljós sem bendir til að þau séu hættuleg börnum. Aftur á móti ef snuðin eru gömul þá er hætta á að túttan fari að losna en líftími snuðs er aðeins um 1-2 mánuðir. Líklegast þykir að þegar um er að ræða snuð sem keypt eru með nafni barnsins á netinu, þá séu þau notuð lengur en mælt er með.

Neytendastofa vill beina þeim tilmælum til foreldra og annarra forráðamanna að fara eftir leiðbeiningum og endurnýja snuðin eftir 1-2 mánuði og henda þeim gömlu. Þá eigi að toga reglulega í túttuna, til að athuga hvort að hún sé að losna. Auk þess vill Neytendastofa benda fólki á að kaupa snuð sem henta aldri barnsins en ekki of lítil snuð, því þau geta verið hættuleg fyrir börn.