Sölubann á 98 áfyllingar fyrir rafrettur

Neytendastofa fór í markaðseftirlit hjá Lukku Láka söluturni sem selur rafrettur og áfyllingar fyrir þær. Reyndust 63 tegundir áfyllinga sem innihéldu nikótín ekki hafa verið tilkynntar til Neytendastofu. Auk þess kom í ljós að innsigli var rofið á 35 tegundum áfyllinga fyrir rafrettur og nikótíni hafði verið bætt við.

Engar upplýsingar lágu fyrir um innihald áfyllinganna og því taldi Neytendastofa áfyllingarnar ekki öruggar og bannaði því sölu á þeim.

Neytendastofa mat jafnframt að umbúðir þriggja áfyllinga höfðuðu sérstaklega til barna eða ungmenna vegna litríkra myndskreytinga, til dæmis með einhyrningum og regnbogum.