Ákvörðun Neytendastofu staðfest

Áfrýjunarnefnd neytendamála hefur staðfest þá ákvörðun að banna Gentle Giants að merkja miðasöluhús fyrirtækisins með orðunum „THE TICKET CENTER“.

Norðursigling kvartaði til Neytendastofu m.a. yfir merkingum á miðasöluhúsi Gentle Giants. Í ákvörðun Neytendastofu nr. 49/2012 var að mati stofnunarinnar merkingin „THE TICKET CENTER“ á miðasöluhúsi Gentle Giants talin gefa til kynna að þar væri um að ræða eina miðasöluhúsið á svæðinu. Í ákvörðuninni var Gentle Giants bannað að merkja og auglýsa miðasöluhúsið með þessari fullyrðingu.

Í úrskurði áfrýjunarnefndar kemur m.a. fram að Gentle Giants og Norðursigling séu í samkeppni um hvalaskoðunarferðir frá Húsavíkurhöfn. Merkingar á miðasöluhúsi Gentle Giants séu með þeim hætti að á framhlið hússins, ofan á þaki þess, standi stórum stöfum ,,WHALE WATCHING“ og fyrir neðan standi litlu minni stöfum ,,THE TICKET CENTER“. Vinstra megin á framhlið hússins sé auglýsingaspjald með vörumerki Gentle Giants. Á suðurhlið hússins stendur stórum stöfum ,,TICKET CENTER“, líkt og á framhlið hússins, en þar sé hins vegar ekkert vörumerki frá Gentle Giants líkt og á framhlið þess. Við mat á því hvort framangreind framsetning sé villandi verði að líta til þess hvaða skilning dæmigerður neytandi megi leggja í hana. Orðin ,,THE TICKET CENTER“ á miðasöluhúsi fyrirtækisins, og framsetning þeirra í samhengi við orðin ,,WHALE WATCHING“ á framhlið hússins, séu með þeim hætti að hinn dæmigerði neytandi megi skilja umrædda framsetningu svo að í húsinu sé að finna miðasölu fyrir allar hvalaskoðunarferðir á svæðinu. Í úrskurði áfrýjunarnefndar var ákvörðun Neytendastofu staðfest.

Sjá úrskurð áfrýjunarnefndar neytendamála nr. 24/2012